Prej gati një muaji, ministri i Brendshëm Sandër Lleshaj, u përfol për një skandal në blerjen e një makine luksoze BMW nga Policia e Shtetit dhe që më pas përdorej nga vetë ministri.
Denoncimi i këtij skandali bëri bujë, ku u tregua se pas tërmetit të 26 nëntorit dhe në kulmin e pandemisë së Covid-19, pra kur vendi po përballej me dy fatkeqësi natyrore, Lleshaj blente nga Policia e Shtetit një BMW të blinduar, e cila sipas akuzave kushtonte 100 mijë euro.
Në foltoren e Kuvendit, ministri Lleshaj e mohoi këtë shumë dhe tha se BMW-ja kishte kushtuar ‘vetëm’ 50 mijë euro, duke sfiduar kështu opozitën që e kishte akuzuar se nëse e vërteta do të dali ndryshe, ai do të jepte dorëheqjen.
Por si qëndron e vërteta? Përse ministri i Brendshëm ra në heshtje pas këtij lajmi dhe nuk ka publikuar asnjë dokument zyrtar për të dëshmuar të kundërtën e akuzave ndaj tij?
Automjeti për të cilin bëhet fjalë, është një mjet tip BMW, me vlerë rreth 100 milionë lekë, blerë nga Policia e Shtetit për Oficerin e Kontaktit në Ambasadën Shqiptare në Gjermani, por që me procedura ekstraligjore, është sjellë në vendin tonë dhe përdoret nga ministri i Brendshëm Sandër Lleshaj.
Pas denoncimit, ministri i brendshëm Lleshaj, vetëm ka hedhur akuza banale nga të gjitha anët, por argumente të bazuara në fakte asnjë.
Në mënyra ordinere ministri tentoi që të shkëpuste vëmendjen duke thënë se shuma e deklaruar nëpër media për BMW-në që përdorte, është e pavërtetë, duke u përpjekur kësisoj të shmangte thelbin e skandalit.
Në fakt nuk qëndron problemi vetëm te shuma, por te procedura ligjore e ndjekur dhe te luksi në të cilën jeton ministri. Ndërkohë që krimi është në kulmin e aktivitetit të tij dhe shumica e shqiptarëve janë në pikë të hallit për shkak të goditjeve nga tërmeti dhe pandemia, ministri Lleshaj kërkon BMW luksoze.
Deri tani ministri nuk ka publikuar ende asnjë dokument zyrtar të BMW-së luksoze, për të cilën ai pretendon se është blerë për ‘vetëm’ 50 mijë euro, që për të në fakt duket se janë hiçgjë.
Të shohim a do ta mbajë fjalën gjeneral Sandër Lleshaj, në rast se zbulohet që BMW-ja e tij luksoze kushton më shumë se ‘vetëm’ 50 mijë euro sipas tij. A do ta japë ai dorëheqjen apo jo?
