Një prokuror, figura e të cilit duhet të merrej në shqyrtim nga trupa e KPK-së, mësohet se ka shantazhuar anëtarët e kësaj të fundit, gjë e cila ka sjellë shtyrjen e seancës.
Kjo gjë ka sjellë reagimin e Ambasadës Amerikane, e cila ka habitur edhe një herë me tërheqjen e vëmendjes që bëri të premten.
Një postim në rrjetet sociale i Ambasadës më të rëndësishme në Tiranë, dukej si “rrufe në qiell të pastër”.
“Shtetet e Bashkuara janë angazhuar që të shohin procesin e vetting-ut në Shqipëri të vazhdojë me profesionalizëm dhe përkushtim. Me dy vendet tona në bordin e ONM-së – një për Departamentin e Shtetit & një për Departamentin e Drejtësisë – për monitorimin e procesit të vetting-ut dhe nëpërmjet vëzhguesit tonë ndërkombëtar, ne sigurohemi që organet e vetting-ut të respektojnë ligjin”,- ishte teksti i shkurtër i postimit, ndërkohë që situata e Vetting-ut duket pa ngjarje të bujshme.
Njësoj si deklarata e ambasadores amerikane 4 muaj më parë, për një marrëveshje kundër Reformës në Drejtësi. U desh ajo deklaratë që të zbuloheshin zhvillimet e nëndheshme të politikës kundër reformës.
Këtë herë nuk bëhet fjalë për politikanë që flirtojnë por për prokurorë që shantazhojnë.
“Dosja.al” shkruante sot se, bëhet fjalë për një prokuror që pret vendimin e Komisionit të Pavarur të Kualifikimit (KPK). Seanca për prokurorin ishte për tu zhvilluar përpara 2 javësh, por u shty papritur, pa asnjë shpjegim nga trupa e KPK.
Sipas burimit, kjo lidhet me një skandal të paprecedentë në historinë e Vettingut. Prokurori, pasi ka tentuar pa sukses t’i joshë anëtarët e komisionit, i ka shantazhuar. Burimet thonë që, janë përdorur përgjime që përfshijnë çështje personale të komisionerëve, por nuk bëhet ende e qartë për çfarë çështjesh është fjala.
Duke qenë se në Vetting-un e prokurorit është relatore dhe e afërmja e një anëtareje të kabinetit qeveritar, çështja përbën një skandal të përmasave të mëdha. Ende nuk dihet se cili nga anëtarët është shantazhuar, por rezultati ka qenë në favor të prokurorit deri tani.
Burimet thanë se ishte përgatitur eleminimi i subjektit, por vendimi u shty papritur dhe nuk mund të thuhet më rezultati.
Mediat janë duke investiguar për të mësuar më shumë rreth çështjes, përpara se të publikojë emrat dhe përmbajtjen.
/Burimi: Dosja.al/ Përshtati: GazetaReforma.com/
