Një tjetër skandal tronditës ka dalë në dritë nga sistemi shëndetësor shqiptar. Raporti i Kontrollit të Lartë të Shtetit ka zbuluar se Farmacia Qendrore e QSUT-së ka mbajtur në gjendje aktive barna të skaduara, duke manipuluar sistemin elektronik dhe duke rrezikuar drejtpërdrejt pacientët më të rëndë.
Sipas raportit, në sistemin elektronik Pentaho figuronin si stok aktiv barna që prej kohësh kishin kaluar afatin e përdorimit:
19 flakonë Ifosfamide 1 g
602 flakonë Methotrexate në dy formëdoza (500 mg dhe 50 mg/2 ml)
Të dyja këto barna përdoren për pacientët me sëmundje të rënda, përfshirë ata me kancer. Pavarësisht se kanë skaduar, ato janë mbajtur në sistem si të disponueshme, duke krijuar një panoramë të rreme mbi rezervat dhe duke rritur artificialisht gjendjen e barnave.
Kontrolli i Lartë i Shtetit paralajmëron se një veprim i tillë paraqet rrezik të madh, si për mbajtjen e stoqeve të pavlefshme në sistem, ashtu edhe për sigurinë e pacientëve.
Gazetari Osman Stafa, i cili ndjek vazhdimisht këto problematika, ka reaguar ashpër duke e cilësuar situatën të frikshme.
“Është dështim i drejtpërdrejtë i Farmacisë Qendrore, që nuk ka hequr barnat e skaduara nga përdorimi dhe ka manipuluar inventarin, duke krijuar përshtypjen e rreme se ka rezerva ndërkohë që pacientët mbeten pa trajtim. Ajo që nuk dimë është se këto barna të skaduara, a janë përdorur mbi pacientë? E frikshme kjo gjetje!”
Ky skandal është një tjetër dëshmi e krizës së thellë në shëndetësinë shqiptare, ku mungesa e transparencës dhe papërgjegjshmëria institucionale rrezikon jetën e qytetarëve.
