1 milionë dollarë janë kaluar gabimisht nga Thesari i Shtetit në llogarinë një kompanie private në fillim të vitit 2019. Personi përgjegjës që ka likuiduar pagesën është pushuar nga puna, ndërkohë që pretendon se i kanë vjedhur llogarinë dhe e kanë bërë këtë transaksion në emër të tij.
Pagesa e kryer në datën 6 shkurt 2019 ka vënë në alarm Ministrinë e Financave, që ka shkarkuar një punonjës megjithëse ai pretendon se nuk ka marrë pjesë në kryerjen e veprimeve.
Sipas një shkrese të Ministrisë së Financave, punonjësi ka denoncuar largimin nga puna, duke u shprehur se nuk ka autorizuar kalimin e pagesës nga Agjencia Kombëtare e Shoqërisë së Informacionit drejt kompanisë Info Soft System.
Fatura bën fjalë për pagesën e shpenzimeve në lidhje me miratimin e marrëveshjes së rinovuar ndërmjet Këshillit të Ministrave dhe Microsoft Corporation, për projektin e partneritetit strategjik. Në shkresë punonjësi thotë nuk është implikuar në këtë ngjarje, ndërkohë që për kryerjen e pagesës janë bërë tri tentativa, dy prej të cilave të dështuara.
Burimet kanë bërë të ditur se dyshohet se ankuesit i është vjedhur IP e kompjuterit, me qëllim që veprimet të paraqiteshin sikur ishin kryer prej tij. Nëse kjo rezulton e vërtetë, duket se përbën shkelje të rëndë dhe cenim të sigurisë së sistemit me të cilin operon buxheti i shtetit.
Përgjegjësja e degës së Thesarit Tiranë, Entela Milo, ka kërkuar të informohet nëse specialisti Elkjer Qema kishte regjistruar në sistemin informatik financiar qeveritar ndonjë faturë për pagesë të Agjensia Kombëtare e Shoqërisë së Informacionit. Specialisti i bën të ditur që nuk ka kryer asnjë veprim të tillë. Në lidhje më këtë çështje, Milo përmes një e-maili, drejtuar specialistit Elkjer Qema, Aurela Velos, personi me përgjegjësinë më të lartë në sistemin e Thesarit, Elmira Fetos, Drejtoreshës së degës së Thesarit Tiranë dhe Lavdërim Sahitaj, drejtorit të Përgjithshëm të Thesarit, deklaron me përgjegjësi të plotë se Qema nuk e ka kryer këtë regjistrim në sistemin e Thesarit.
/GazetaReforma.com/
