Reshjet e dëborës që kanë nisur prej mbrëmjes së djeshme kanë bllokuar 11 fshatra në Elbasan.
Bora ka vijuar deri në orët e para të mëngjesit duke shkaktuar probleme me lëvizjen e mjeteve dhe ngrica në rrugë. Disa zona të Elbasanit dhe Librazhdit kanë mbetur pa energji elektrike.
Mësohet se temperaturat kanë qenë nën zero grade gjë qe ka sjellë praninë e ngricave në akset rrugore nacionale, rurale dhe në rrugët e brendshme të bashkive të qarkut.
Gjate natës është ndërhyrë në 2 raste urgjente ku rrezikohej jeta e shtetasve. Në fshatin Xibrake te Njësisë Administrative Labinot Fushe një autoambulancë, që ishte njoftuar për një rast urgjence, ka mbetur e bllokuar.
Është dashur ndërhyrja nga ana e punonjësve të bashkisë që të bëhej e mundur transportimi i të sëmurit drejt spitalit.
Ndërkohë në fshatin Gjyrale të Njësisë Administrive Gostimë si pasojë e mungesës së energjisë elektrike u mundësua nga ana e bashkise Cerrik dërgimi i një gjeneratori për një të semur me Covid-19, i cili përdorte aparaturë oksigjeni.
Në aksin rrugor nacional Elbasan-Rrogozhinë (në Balldren), Elbasan-Belsh (në Shales), Elbasan-Gramsh (në Banje) mengjësin e sotëm ka pasur bllokime të pjesshme nga prezenca e madhe e akullit.
Në akset Elbasan-Qafe Thanë e Elbasan-Gjinar trashësia e dëbores ka arritur mbi 20 cm trashësi por tashme kjo është nën ndikimin e temperaturave të uleta gjë që ka krijuar ngrica.
Në aksin rrugor Librazhd-Stebleve një pjesë e aksit është e bllokuar në segmentin Fushë Studen-Klenjë ku kemi një prezencë dëbore deri 70 cm trashësi. Po punohet për hapjen e rrugës nga firma kontraktuese.
