Autoritetet greke po vazhdojnë përballjen me zjarre në ishullin Evia. Më shumë se 2,000 njerëz tashmë janë evakuuar. Zyrtarët lokalë thanë se disa pjesë të ishullit tashmë janë shkatërruar derisa u ankuan se nuk ishte dërguar ndihmë e mjaftueshme për të shuar zjarret.
Kryetari i qytetit Istiaia në ishullin Evia, Giannis Kontzias, tha për mediat lokale se, “tashmë është shumë vonë, zona është shkatërruar”.
Greqia po përballet me valën e saj më të rëndë të të nxehtit në 30 vitet e fundit. Temperaturat kanë shkuar deri në 45 gradë Celsius (113F).
Gjatë ditëve të fundit zjarre ka pasur edhe në rajone tjera të Greqisë. Një zjarr në periferinë veriore të Athinës thuhet se është shuar.
Ekspertët thonë se vala e nxehtësisë po bëhet më e mundshme dhe më ekstreme për shkak të ndryshimeve klimatike të shkaktuara nga njerëzit, shkruan REL.
Me një situatë të tillë gjatë kësaj periudhe janë përballur edhe vende tjera, përfshirë Turqinë dhe vendet e Ballkanit Perëndimor.
Edhe në Shqipëri, situata me zjarret nuk është aspak e mirë. Prej 17 ditësh, vendi ynë është pushtuar nga flakët dhe ka pasur edhe evakuuime. Ndihmat për Shqipërinë kanë ardhur nga BE dhe nga Amerika, të cilët kanë sjellë helkopterë dhe forca ushtarake ditët e fundit.
