Presidenti i Shteteve të Bashkuara të Amerikës, Joe Biden në një deklaratë për mediat ka thënë se SHBA është në kontakt të vazhdueshëm me talebanët. Biden ka thënë se grupit të militantëve që ka marrë në kontakt Afganistanin iu është bërë e qartë se ata mund të presin një “përgjigje të shpejtë dhe të fuqishme” nga SHBA nëse angazhohet në ndonjë sulm ndaj amerikanëve.
Po ashtu kreu i Shtëpisë së Bardhë është zotuar se zyrtarët po monitorojnë për çdo sulm terrorist. Biden ka thënë se do të nxjerrin jashtë Kabulit çdo shtetas amerikan që ndodhet aty.
“Ne ndaluam fluturimet jashtë Kabulit këtë mëngjes për t’u siguruar që ne mund të përparonim të evakuuarit në pikat e tyre të tranzitit.”, ka thënë Biden.
Po ashtu ai ka sqaruar se fluturimi ka rinisur sërish normalisht: “Komandanti ynë në Kabul ka dhënë urdhrin që procesi të rinisë.”
Biden ka thënë se 5,700 persona janë evakuuar ditën e djeshme, përfshirë 169 amerikanë që “kaluan murin në aeroport duke përdorur asetet ushtarake”. Më tej u shpreh se SHBA -ja gjithashtu ka ofruar mbështetje ushtarake për aleatët dhe gazetarët që ndodhen ende në Kabul.
“Më lejoni të jem i qartë. Çdo amerikan që dëshiron të kthehet në shtëpi ne do ta çojmë në shtëpi,” zotohet ai. Por, shton se “nuk mund të premtoj se cili do të jetë rezultati përfundimtar” për shkak të rrezikut në terren.
