Shqipëria po përjeton një situatë alarmante me zjarret, ndërsa vetëm në 24 orët e fundit janë regjistruar 24 vatra aktive në disa zona të vendit.
Më shqetësueset mbeten ato në Dibër, Fier dhe Vlorë, ku flakët kanë shkaktuar dëme të konsiderueshme në sipërfaqe të mëdha toke.
Sipas të dhënave nga Emergjencat Civile, deri tani janë djegur mbi 154 hektarë me shkurre dhe bimësi, si dhe më shumë se 3,000 rrënjë ullinj.
Për përballimin e situatës janë angazhuar 538 forca operacionale, 57 mjete zjarrfikëse dhe dy helikopterë të cilët kanë ndërhyrë nga ajri një ditë më parë.
Që prej orëve të para të mëngjesit të sotëm, edhe 50 efektivë të Forcave të Armatosura me pesë automjete zjarrfikëse janë vendosur në terren për të ndihmuar në zonat më të prekura.
Zjarri më problematik vijon të jetë në Parkun Kombëtar të Lurës, ku dy vatra janë ende aktive – një pranë Gurë Lurës dhe një tjetër afër kanalit të ujit të HEC-it.
Një vatër tjetër në Malin e Dejës po përhapet me shpejtësi drejt bashkisë Mat. Në Bulqizë, Mali i Peladhisë është përfshirë nga flakët, me rreth 32 hektarë të djegur, ndërsa një tjetër vatër mbi fshatin Vlash mbetet nën monitorim.
Në Fier dhe Mallakastër, flakët në zonën Drenovë–Gorishovë vazhdojnë të jenë të forta, duke rrezikuar edhe ullishtet e fshatit.
Në Himarë, zjarri në Borsh ka prekur një sipërfaqe pyjore, dhe megjithëse është zbutur, ende nuk është izoluar plotësisht. Ushtria ka qenë e pranishme për të ndihmuar në shuarjen.
Ndërkohë, Instituti i Gjeoshkencave ka bërë me dije se nuk parashikohen reshje, ndërsa rreziku i përhapjes së flakëve mbetet i lartë në qarqet Tiranë, Elbasan, Fier, Berat, Korçë dhe Gjirokastër.
Strukturat e Mbrojtjes Civile janë në gatishmëri maksimale, ndërkohë që u bëhet thirrje qytetarëve të tregojnë kujdes dhe të njoftojnë shërbimet emergjente në numrin 112 për çdo rast zjarri.
