Gjatë 24 orëve të fundit, Qendra Kombëtare Operacionale e Emergjencave Civile, pranë Agjencisë Kombëtare të Mbrojtjes Civile, ka raportuar për 8 vatra zjarri në territorin e vendit, të cilat janë izoluar me sukses.
Në operacionet për shuarjen e flakëve janë angazhuar 78 forca operacionale, 11 automjete zjarrfikëse si dhe mjete të tjera ndihmëse, të cilat ndërhynë në qarqet Fier, Lezhë, Vlorë, Shkodër, Tiranë dhe Berat.
Sipas Institutit të Gjeoshkencave, për ditën e sotme në qarkun e Fierit parashikohet rrezik “i lartë” për zjarre, ndërsa për qarqet e tjera niveli i rrezikut mbetet “i moderuar”.
Ministria e Mbrojtjes dhe Agjencia Kombëtare e Mbrojtjes Civile u bëjnë thirrje qytetarëve të tregojnë kujdes të shtuar gjatë këtyre ditëve me temperatura të larta dhe të raportojnë menjëherë çdo vatër zjarri që konstatojnë.
Zjarret që kanë përfshirë sipërfaqe pyjore në disa zona janë shpesh pasojë e pakujdesisë njerëzore, jo e kushteve atmosferike. Autoritetet theksojnë se edhe pse temperaturat janë të larta, ato nuk përbëjnë shkak të drejtpërdrejtë për ndezjen e flakëve.
Fatkeqësisht, rastet kur personat përgjegjës për zjarrvënie marrin ndëshkimin e merituar janë ende të rralla. Në këtë drejtim, kërkohet një reagim më i ashpër nga drejtësia për të garantuar parandalimin dhe përgjegjshmërinë ligjore.
