Rradha e madhe për të hyrë në shtetin fqinj Greqi nëpërmjet pikës kufitare të Kakavijës ka sjellë shumë tension dhe një situatë kaotike per qytetarët që kanë më shumë se tri ditë që presin të largohen nga vendi ynë.
Në lidhje me këtë situatë kaotike ka reaguar edhe Ministria për Evropën dhe Punët e Jashtme, e cila thotë se është vënë në kontakt me palën greke dhe janë shtuar testet dhe nga 200 testime në orë në këto momente është arritur të realizohen 330 testime në orë.
Gjithashtu në njoftim thuhet se MPEJ është në bisedime me palën greke për zgjatje të orarit të punës në pikën kufitare në mënyrë që qytetarët të mund të kalojnë edhe në orë e vona të natës.
Ndërkohë Ministria e Shëndetësisë dhe Ministria e Mbrojtjes kanë vendosur në dispozicion të qytetarëve të bllokuar në rradhë disa ekipe mjekësore dhe autoambulanca, si dhe shërbime higjenosanitare.
Postimi i plotë:
Pas vendimit të autoriteteve greke për të kërkuar vetëizolim 7 ditor dhe çertifikatë të testit negativ për të gjithë shtetasit që kalojnë nga Shqipëria në Greqi duke nisur nga data 17 gusht, gjatë dy ditëve të fundit ka patur një fluks të shtuar qytetarësh në pikat e kalimit kufitar.
Ministria për Evropën dhe Punët e Jashtme është vënë në kontakt të menjëhershëm me palën greke dhe fillimisht u bë i mundur shtimi i testimeve të kryera në pikat kufitare prej 200 testimesh në orë, ndërsa në këto momente është arritur të realizohen 330 testime në orë.
Testimi vazhdon pa ndërprerje, për të gjithë qytetarët që kërkojnë të kalojnë nga Shqipëria në Greqi. Ndërkohë, nga autoritetet greke na është premtuar shtimi i metejshëm i kapaciteteve testuese në oret në vijim.
Po ashtu, jemi në bisedime për të zgjatur orarin e punës në pikat kufitare, në mënyrë që qytetarët të mund të kalojnë edhe në orë e vona të natës.
Nga ana tjetër, Ministria e Shëndetësisë dhe Ministria e Mbrojtjes kanë vendosur në dispozicion të qytetarëve të bllokuar në rradhë disa ekipe mjekësore dhe autoambulanca, si dhe shërbime higjenosanitare.
Ne vazhdojmë të jemi në kontakt të vazhdueshë me palën greke dhe shpresojmë që situata të shkojë drejt një zgjidhje sa më të shpejtë.
