Ministria e Mbrojtjes ka bërë të ditur përditësimet lidhur me situatën e zjarreve në vend gjatë 24 orëve të fundit. Nga 29 vatra zjarri të raportuara, vetëm dy vazhdojnë të jenë aktive.
Zjarri ende po digjet në vendgrumbullimin e mbetjeve në Elbasan dhe në zonën midis fshatrave Grazhdan dhe Malçan në Finiq. Në këtë të fundit, situata është përmirësuar dhe intensiteti i flakëve ka pësuar ulje.
Sipas ministrisë, zjarret kanë prekur kryesisht sipërfaqe me pemë, shkurre dhe barishte, duke shkatërruar rreth 18 hektarë dhe afërsisht 220 rrënjë ullinj. Për sot parashikohet që rreziku i zjarreve të mbetet “I LARTË” në pothuajse të gjitha qarqet e vendit.
NJOFTIMI I PLOTË:
Situata e zjarreve në rang vendi
Gjatë 24 orëve të fundit janë raportuar 29 vatra zjarri, nga të cilat 2 vatra janë ende aktive.
Këto vatra zjarri janë evidentuar në bashkitë e Elbasanit, Finiqit, Selenicës, Vlorës, Memaliajt, Libohovës, Dropullit, Kamzës, Tiranës, Durrësit, Kavajës, Rrogozhinës, Fierit, Divjakës, Vaut të Dejës, Malësisë së Madhe dhe Lezhës.
Aktualisht mbeten aktive vatrat:
– Në vendgrumbullimin e mbetjeve, në bashkinë Elbasan, ku vijon puna për shuarjen e plotë të vatrës.
– Ndërkohë, në vatrën e zjarrit midis fshatit Grazhdan, njësia administrative Livadhja dhe fshatit Malçan, njësia administrative Dhivër, bashkia Finiq, situata sot është më e qetë dhe intensiteti i zjarrit ka rënë, por situata po monitorohet.
Si pasojë e zjarreve të rëna kryesisht në sipërfaqe me pemë, shkurre dhe barishte janë djegur rreth 18 hektarë dhe rreth 220 rrënjë ullinj.
Në operacionet për shuarjen e zjarreve u angazhuan 64 automjete zjarrfikëse dhe 252 forca operacionale. Gjithashtu në operacionet e ditës së djeshme morën pjesë edhe Forcat e Armatosura me 35 efektivë, 4 automjete zjarrfikëse, 4 kamionë vetëshkarkues, dhe 1 traktor me zinxhirë.
Bazuar në parashikimet e Institutit të Gjeoshkencave, sot pritet nivel rreziku “I LARTË” për zjarret në pothuajse të gjitha qarqet.
I gjithë sistemi i mbrojtjes civile është në ndjekje të situatës dhe në gatishmëri për të ofruar mbështetje të menjëhershme nëse do të jetë e nevojshme.
Përsërisim thirrjen për qytetarët që, në këto ditë me temperatura të larta dhe rrezik të shtuar për zjarre, të tregojnë kujdes maksimal dhe përgjegjshmëri. Të shmangin çdo veprim që mund të shkaktojë zjarr, si ndezja e zjarreve në ambiente të hapura, djegia e mbetjeve apo hedhja e objekteve të ndezshme në natyrë.
Çdo rast zjarri duhet të njoftohet menjëherë pranë strukturave vendore.
