Gjatë 24 orëve të fundit janë regjistruar 9 vatra zjarri në pesë bashki të vendit: Tiranë, Durrës, Kavajë, Lezhë dhe Berat.
Në 6 raste, flakët kanë përfshirë sipërfaqe me shkurre dhe barishte, duke djegur rreth 0.5 hektarë.
Ndërsa në dy raste të tjera, zjarret kanë rënë në banesa: një në lagjen nr. 5 të Kavajës dhe një tjetër në fshatin Ishull Shëngjin, ku janë raportuar dëme materiale. Në këtë të fundit, për shkak të një rrjedhjeje gazi, një grua ka mbetur e lënduar dhe është dërguar menjëherë në Spitalin e Traumës.
Në një rast të veçuar, një automjet privat është përfshirë nga flakët, duke pësuar dëme materiale, pa pasoja për njerëzit.
Në operacionet për shuarjen e zjarreve janë angazhuar 9 forca operacionale dhe 64 automjete zjarrfikëse.
Sipas Institutit të Gjeoshkencave, për ditën e sotme nuk parashikohen reshje shiu. Ndërkohë, rreziku nga zjarret mbetet i lartë në qarqet Lezhë, Durrës, Tiranë dhe Fier, ndërsa në qarqet e tjera niveli i rrezikut është i moderuar.
Mekanizmi i Mbrojtjes Civile, si në nivel vendor ashtu edhe qendror, vijon të jetë në gatishmëri të plotë për menaxhimin e çdo situate.
U bëhet thirrje qytetarëve që të tregojnë kujdes të shtuar gjatë këtyre ditëve me temperatura të larta dhe të raportojnë menjëherë çdo vatër zjarri apo situatë të dyshimtë pranë strukturave përkatëse.
