Eksperti i pensioneve, Kujtim Hoxha, në një intervistë për emisionin Koha për t’u zgjuar, bëri të ditur se sistemi i pensioneve sociale në Shqipëri pritet të pësojë ndryshime të thella.
Sipas tij, skema e re do të fokusohet më shumë te kontributi individual i secilit qytetar gjatë viteve të punës, duke e lidhur përfitimin financiar nga shteti me historikun e sigurimeve shoqërore të individit.
Hoxha sqaroi gjithashtu procedurën për rastet e paaftësisë së përkohshme për punë. Nëse një i punësuar sëmuret, fillimisht sëmundja vlerësohet nga mjeku i familjes, i cili lëshon një raport për një periudhë deri në 14 ditë.
Pas këtij afati, vlerësimi kalon në duart e Komisionit Mjeko-Ligjor, i cili vendos nëse personi është ende i paaftë për të punuar. Gjatë kësaj periudhe, qytetari ka të drejtë të përfitojë ndihmën financiare të njohur si “kempi”.
“Kur një i punësuar është i sëmurë, në ditët e para vlerësohet sëmundja nga mjeku i familjes, më tej sigurohet nga Komisioni Mjeko-Ligjor, pasi kalojnë 14 ditë. Raporti te mjeku i familjes është 14 ditë. Komisioni Mjeko-Ligjor vendos nëse një person nuk është i aftë për punë dhe qytetari përfiton atë që quhet në gjuhën popullore, kempi. Pretendohet të ndryshohet paga minimale. Do ndryshojë koncepti i pensionit social, që do jetë në raport me kontributin që ke dhënë. Administrata shtetërorë duhet që të informojë qytetarët më mirë,” tha eksperti i pensioneve Kujtim Hoxha
