Sir Keir Starmer ka mbajtur sot fjalimin e tij të parë si kryeministër i Britanisë së Madhe para kombit, nga foltorja e Downing Street. Me një ton të vendosur dhe optimist, Starmer deklaroi: “Puna për ndryshimin fillon menjëherë,” duke pranuar gjithashtu se “kjo nuk do të ishte aq e thjeshtë sa të ndezës një çelës.”
Starmer, i cili udhëhoqi Partinë Laburiste drejt një fitoreje dërrmuese në zgjedhje pas një kolapsi në votën e konservatorëve, u shpreh mbi nevojën urgjente për të ndërtuar një infrastrukturë të qëndrueshme të mundësive në vend. Ai theksoi rëndësinë e shkollave dhe shtëpive të përballueshme, duke u zotuar të “rindërtojë” vendin “tullë pas tulle.”
“Qeveria jonë do të jetë një qeveri shërbimi,” tha Starmer, duke kërkuar një “rinisje” kombëtare. Ai nuk harroi të përmendë “sfidat e një bote të pasigurt” dhe rolin që Britania e Madhe duhet të luajë në përballimin e këtyre sfidave.
Në një shfaqje të unitetit kombëtar, Starmer përmendi se katër kombet e Mbretërisë së Bashkuar “po qëndrojnë përsëri së bashku duke u përballur me sfidat e një bote të pasigurt, siç kemi pasur në të kaluarën.”
Fjalimi debutues i Starmer në Downing Street vjen pasi ai mori mandatin zyrtar nga Mbreti për të formuar një qeveri të re. Starmer gjithashtu përshëndeti punën e paraardhësit të tij, Rishi Sunak, duke e cilësuar si kryeministrin e parë aziatiko-britanik të vendit.
“Me respekt dhe përulësi, ju ftoj të gjithëve t’i bashkoheni kësaj qeverie shërbimi në misionin e ripërtëritjes kombëtare,” tha ai. “Puna jonë është urgjente dhe ne e fillojmë sot.”
Në përfundim të fjalimit të tij, Starmer tha “faleminderit” dhe u kthye për të përshëndetur njerëzit pas tij, duke hyrë më pas në 10 Downing Street.
Kjo shënon fillimin e një kapitulli të ri për Britaninë e Madhe, ndërsa Starmer dhe qeveria e tij përgatiten për të përballuar sfidat dhe për të zbatuar ndryshimet e premtuara për të ardhmen.
