Në një intervistë për mediat gazetari investigative Artan Hoxha ka treguar që Dritan Rexhepi, i cili u arrestuar në Turqi një ditë më parë është shqiptari më i këkruar i botës së narkotrafikut në nivel global.
Gazetari deklaroi gjatë një interviste në “Euronews Albania” se Rexhepi ndonëse ishte më i kërkuari, nuk ishte më i paguari në botën e drogës.
“Dritan Rexhepi nuk ishte shqiptari më i kërkuar në Shqipëri, por shqiptari më i kërkuar në nivel global. Kjo për shkak të asaj që ai përfaqësonte. Flasim për aktivitet kriminal të hetuar në rang global. Shqipëria nuk ka patur deri në këto nivele. Njëri që u kap në Kolumbi, nuk përfaqësonte asgjë në krimin shqiptar.
Por meqë ne jemi shumë ekzotik në Amerikën Latine, lajmi përhapet me shpejtësi. Lajmi për ElGordon ishte se ishte në kërkim në 178 vende, por në fakt po u shpalle në kërkim nga Interpol Tirana, automatikisht ti je në kërkim në të gjitha vendet që janë pjesë e marrëveshjes. Shqiptarët janë shumë në modë vitet e fundit.
Zënë shumë vend në media. Dritan (Gramoz) Rexhepi në këtë kontekst i plotëson gjithë komponentët për të ndodhur ajo që ndodhi. Reuters që është agjenci ekonomike dhe merret me këtë fushë dhe t’i kushtonte një lajm Gramoz Rexhepit, vetëm për shkak të vendit që kishte zënë Rexhepi. Gramoz Rexhepi ka qenë shqiptari më i rëndësishëm në rast global. Është njeri që ka qenë disa herë në burgje, që është arratisur disa herë nga burgjet.
Në të vërtetë, si imazh, si emër, si staturë, deri dje ai ka qenë shqiptari më i rëndësishëm në botën e narkotrafikut. Por si peshë, si vlerë monetare, ai nuk është shqiptari më i rëndësishëm. Ai mund të jetë shqiptari që ka ndikuar shumë në trafikun e sasive të mëdha të kokainës. Por ka të tjerë që kanë kryer tonelata të tëra me lëndë narkotike. Prandaj them unë që më i rëndësishmi është ai që nuk i përmendet emri”, ka deklaruar Artan Hoxha.
