E ardhmja e Antoine Griezzman ka qenë në qendër të vëmendjes ditët e fundit, pasi duket se ai nuk ka vend në planet e Barcelonës. Fillimisht u raportua se francezi do të rikthehej tek Atletico Madrid dhe në këmbim Barça do të merrte Saul Niguez, por trataivat dështuan në momentin e fundit.
Ndërkohë mediat franceze bën me dije një tjetër synim të Barcelonës për ta shkëmbyer Griezmann me Paolo Dybala të Juventusit, një futbollist që e kanë kërkuar prej kohësh.
Mirëpo, trajneri i Atletico, argjentinasi Diego Simeone i ka trazuar sërish ujërat përsa i përket të ardhmes së sulmuesit francez. Në një intervistë për mediat madrilene “El cholo” tha se dëshiron që Griezmann të dalë sa më mirë te Barcelona.
“Kam një marrëdhënie shumë të mirë, një marrëdhënie të bukur përtej sportit. Përtej gjithçkaje që ai i dha Atléticos, unë dua që ai të dalë mirë te Barcelona, ai është një lojtar i jashtëzakonshëm. Tek Barcelona, edhe duke mos luajtur rregullisht, ai kurrë nuk bie nën njëzet gola. Unë nuk pres asgjë tjetër përveç se ai do të triumfojë me Barcelonën”, tha tekniku për |As”.
Por Simeone deklaroi se Atletico gjithashtu ka nevojë për një sulmues dhe nëse nuk është francezi, atëherë do të jetë dikush tjetër.
“Ne e njohim njëri-tjetrin, ne flasim me klubin, ka pozicione për të përmirësuar në ekip, ne kemi nevojë për një sulmues. Një tjetër do të vijë nëse Griezmann nuk do të vijë. Atje klubi do të vendosë se çfarë është më e mira për situatën tonë financiare”, tha Simeone.
