Një skenë si nëpër filma aksion ka ndodhur ditën e sotme në mes të Tiranës, ku një i ri në drejtimin e një “Land Rover”-i sfidoi policinë, duke shkaktuar kaos në rrugët e qytetit.
Ngjarja nisi në zonën e Medresesë, kur shoferi refuzoi t’i ndalonte postbllokut të policisë. Në përpjekje për t’u larguar, ai përplasi makinën e policisë dhe disa automjete të tjera, duke rrezikuar seriozisht jetën e kalimtarëve.
Policia u vu menjëherë në ndjekje, ndërsa shumë qytetarë u bënë dëshmitarë të momentit dramatik që ndodhi në mes të ditës, në një nga zonat më të frekuentuara të kryeqytetit.
Pas një ndjekjeje intensive, forcat e rendit arritën ta kapin dhe ta vënë në pranga autorin e incidentit.
Ngjarja ka shkaktuar panik dhe indinjatë në publik, ndërsa pritet që autoritetet të zbardhin më tej motivet që çuan të riun në këtë sjellje të rrezikshme dhe identitetin e tij.
