Kreu i Komisionit Qendror të Zgjedhjeve ka propozuar që fleta e votimit të jetë me emrat e kandidatëve për deputetë dhe jo me numra. Ky ka qenë varianti që është propozuar nga Partia Demokratike, ndërsa Partia Socialiste ka kërkuar që fletët të jenë me numra.
Kujtojmë që mbledhja e KQZ për të vendosur për fletën e votimit u shty ditën e djeshme për sot, pasi përfaqësuesi i PS, Eridjan Salianji kërkoi ndërprerjen e mbledhjes pasi sipas tij fleta e votimit nuk është kompetencë e Komisionerit Rregullator, por e kreut të KQZ, Celibashit. Ai madje ka thënë se ka rezerva edhe për propozimin e Celibashit, të cilat do i shprehë te KQZ.
Pas mbledhjes së djeshme Celibashi deklaroi se do të sillte një propozim konkret për të vendosur në mënyrë përfundimtare brenda 24 orëve.
‘’E risqaroj, që aktin që kam paraqitur po e tërheq për ta sjellë me një propozim konkret me përmbajtjen e fletës së votimit. Nuk i përjashton gjithë variantet dhe opsionet që Komisioneri veçmas apo me të tjerë që ka bërë për përmbajtjen. Për ta riparaqitur në këtë mënyrë, do t’iu japë kohë edhe për të bërë diskutimin e kompetencës. Dhe të kërkoni që ky akt, një paraqitje jo më vonë se në 24 orë të vendosni dhe në mënyrë përfundimtare. ‘’- tha Celibashi.
