Ukrainasit vazhdojnë të zbulojnë më shumë trupa përreth kryeqytetit, Kiev, më shumë se një javë pasi trupat ruse u larguan nga zona për t’u përqëndruar në Ukrainën lindore.
“Me keqardhje, mund të them se kemi gjetur trupat e 900 civilëve të vdekur dhe ia kemi transferuar ekspertëve mjeko-ligjorë,” tha në një konferencë shefi i policisë së rajonit të Kievit, Andriy Nebytov.
Nebytov tha se më shumë se 350 prej trupave u morën nga Bucha – ku provat e mizorive kanë çuar në akuza për krime lufte kundër trupave ruse, të mohuara me forcë nga Moska.
Heqja e rrënojave në Borodyanka dhe Makarov është ende në vazhdim dhe “do të ketë ende trupa të njerëzve të vdekur nën rrënoja,” shtoi shefi i policisë.
Ai theksoi se të vrarët ishin civilë dhe nuk kishin asnjë lidhje me formacionet ushtarake.
Tensionet mes Rusisë dhe Ukrainës kanë një parahistori, që arrin deri në Mesjetë. Të dy vendet kanë rrënjë të përbashkëta në shtetin sllavo-lindor Perandoria Kiev, ndaj presidenti i Rusisë Valdimir Putin sot preferon të bëjë fjalë për “një popull”. Në të vërtetë rrugët e të dy kombeve prej shekujsh kanë qenë të ndara, u krijuan dy gjuhë dhe dy kultura – ngushtësisht të familjarizuara e megjithatë të ndryshme.
Ndërsa Rusia politikisht u zhvillua në perandori, Ukraina nuk ia doli që të ndërtojë shtetin e vet. Në shekullin e 17 territore të mëdha të Ukrainës së sotme ishin pjesë e perandorisë ruse. Pas shpërbërjes së saj më 1917 Ukraina për një kohë të shkurtër u bë e pavarur, derisa Rusia sovjetike e ripushtoi atë ushtarakisht. Në dhjetor 1991 Ukraina bashkë me Rusinë dhe Bjellorusinë bënte pjesë ndër tri republikat si motra, që vulosën shpërbërjen e Bashkimit Sovjetik.
Moska donte ta ruante influencën e saj dhe e konsideroi themelimin e Bashkësisë së Shteteteve të Pavarura (GUS) si një instrument për qëllimin e saj. Kremlini besonte edhe, se vendi fqinj përmes furnizimeve të leverdisshme me gaz mund ta mbante të lidhur këtë bashkësi me Rusinë. Por ndodhi ndryshe. Ndërsa Rusia dhe Bjellorusia krijuan një aleancë të ngushtë, Ukraina gjithnjë e më shumë orientohej nga Perëndimi.
