Seanca e sotme për çështjen “Gërdeci” është shtyrë dhe do të zhvillohet më 7 prill. Shkak i shtyrjes ka qenë mungesa e ish-ministrit të Mbrojtjes, Fatmir Mediu, i cili nuk mori pjesë pasi ka një ftesë nga Kongresi Amerikan që zgjat nga data 24 mars deri më 1 prill.
Avokati i Mediut, Henrik Ligori, theksoi se ish-ministri duhet të jetë personalisht i pranishëm për të paraqitur komentet mbi aktin e ekspertimit teknik ushtarak. Ndërkohë, avokati i familjarëve të viktimave, Dorian Matlia, kërkoi që pretendimet të depozitoheshin me shkrim në formë të ekonomisë gjyqësore.
Prokurori Klodian Braho e konsideroi mungesën e Mediut të pajustifikuar dhe kërkoi që seanca të vazhdonte në prani të avokatit, por ky kërkesë u kundërshtua nga Ligori. Gjyqtarja Irena Gjoka vendosi të shtyjë seancën dhe i tërhoqi vëmendjen Mediut, duke theksuar se mungesat e këtij lloji nuk do të tolerohen në seancat e ardhshme.
Në seancë ishte e pranishme edhe Zamira Durda, e cila shprehu frustrimin e saj pas 17 vitesh pritje për drejtësi. Durda humbi djalin e saj në tragjedinë e Gërdecit dhe vazhdon të kërkojë që përgjegjësit të marrin dënimin që meritojnë.
Ish-ministri Mediu është i akuzuar për tragjedinë e 15 marsit 2008, kur shpërthimi në një punishtje demontimi armësh në Gërdec i mori jetën 26 personave dhe la qindra të tjerë të plagosur. Mediu po gjykohet për akuzat e “Shpërdorimit të Detyrës” dhe “Shpërdorim të detyrës në bashkëpunim me subjekt ushtarak-kuadër komandues”. Ai ka mohuar akuzat, duke insistuar se gjatë kohës në detyrë ka zbatuar gjithmonë ligjin.
