Seanca e parë gjyqësore për çështjen e njohur si dosja “5D”, që po shqyrtohet në Gjykatën e Posaçme kundër Korrupsionit dhe Krimit të Organizuar, u shty sërish.
Shkak për shtyrjen u bë zëvendësimi i avokatit të të pandehurit Redi Molla, ndërsa një tjetër mbrojtës kërkoi kohë shtesë për t’u njohur me aktet e dosjes.Seanca e radhës u caktua për datën 30 prill.
Në këtë proces gjyqësor, ish-drejtori i Përgjithshëm i UKT-së, Redi Molla, dhe ish-drejtori i Departamentit Mbështetës në të njëjtën shoqëri, Mariglen Qato i cili më pas ka mbajtur edhe detyrën e kryeinspektorit të IKMT-së në Bashkinë e Tiranës po përballen me akuza për korrupsion pasiv, mosdeklarim të pasurisë dhe pastrim parash.
Ndërkohë, pesë të akuzuar të tjerë, Taulant Tushe, Nestor Muhametllari, Albano Janku, Julian Zanaj dhe Enton Punavia, do të gjykohen për veprën penale të shkeljes së barazisë në tendera.
Sipas SPAK, hetimet kanë provuar se Molla dhe Qato kanë qenë pronarët “de facto” të kompanisë 5D Konstruksion sh.p.k, duke përdorur emra të tjerë si pronarë fiktivë. Përmes kësaj skeme, vetëm në dosjen në fjalë, rezulton se kanë fituar 12 tendera publike me një vlerë totale prej rreth 2 milionë euro, gjatë periudhës 2016–2020.
Gjithashtu, është dokumentuar se gjatë viteve 2016–2018, kur Mariglen Qato mbante postin e drejtorit të Departamentit Mbështetës në UKT, kompania 5D ka fituar katër tendera në mënyrë të parregullt, të dhëna nga Bashkia Tiranë, Tirana Parking dhe Klubi Sportiv Tirana, në kundërshtim me ligjin mbi prokurimet publike.
Procesi gjyqësor për dosjen “5D” pritet të hedhë dritë mbi një nga skemat më të përfolura të keqpërdorimit të fondeve publike përmes tenderave fiktivë dhe ndikimit të funksionarëve të lartë në sektorin publik.
