Gjyqi për dosjen 184 është shtyrë sërish, gjithashtu mësohet se gjyqtarja e çështjes ka marrë vendimin për të gjobitur dy avokatët e të akuzuarve.
Seanca e të akuzuarve për ndikim në zgjedhjet lokale të vitit 2016 në Dibër, për shtetasit Nuri Meda, Drini Gjeci, Hasan Hotit dhe Robert Agës, janë shtyrë sërish të martën dhe të mërkurën.
Ditën e djeshme ishte caktuar seanca e radhës për të akuzuarit Drini Gjeci dhe Nuri Meda, por kjo seancë nuk u zhvillua për shkak të mungesës së gjyqtarit të çështjes. Ndërsa ditën e sotme është shtyrë seanca për ish-administratorin e Njësisë Administrative Lurë, Hasan Hoti dhe ish shefin e komisariatit të Dibrës, Robert Aga. Bëhet me dije se seanca e sotme është shtyrë për shkak të mungesës së palës mbrojtëse.
Mësohet se seancat e radhës për këtë dosje do të mbahen në fillim të muajit nëntor, për shkak të ndarjes së çështje dhe pasi dy nga katër të akuzuarit kanë kërkuar gjykim të shkurtuar.
Sjellim në vëmendje se dosja 184 vjen para gjykatës së Dibrës pas një ping-pongu të gjatë mes institucioneve të drejtësisë. Zgjedhjet lokale të 2016 u zhvilluan pas arrestimit të kryetarit të atëhershëm Shukri Xhelili për shkak të një skandali seksual. Në zgjedhjet e fituara nga kandidati i PS-së Agim Rama, sipas akuzës së prokurorisë, ka pasur shit-blerje votash, por personat përgjegjës s’mund të hetoheshin pasi vepra penale ishte parashkruar (u kishte kaluar afati sipas Kodit të Procedurës Penale).
