Seanca gjyqësore për dosjen “Plumbi i Artë” është shtyrë për në datën 2 shtator. Arsyeja e shtyrjes lidhet me mungesën e avokatit Artan Simoni, i cili mbron bashkëpunëtorin e drejtësisë Nuredin Dumani.
Të pandehurit në këtë çështje përballen me akuza të rënda, që përfshijnë disa vrasje, atentate të dështuara dhe vjedhje me dhunë.
Hetimet janë zhvilluar mbi bazën e dëshmive të Nuredin Dumanit, i cili ka pranuar të bashkëpunojë me drejtësinë dhe ka zbuluar një sërë krimesh të kryera gjatë dekadës së fundit.
Sipas Prokurorisë së Posaçme, Dumani ka dhënë detaje për të paktën 12 vrasje dhe shumë ngjarje të tjera kriminale, përfshirë porositë për ekzekutime me pagesa që shkonin deri në 200 mijë euro. Procesi ndaj të pandehurve vazhdon të jetë një ndër më të rëndësishmit në luftën kundër krimit të organizuar në vend.
