Ish-presidenti Bujar Nishani është shtruar ditën e sotme në spitalin “Shefqet Ndroqi”.
Burime për ‘Balkan Web’ bëjnë të ditur se ish kreu i shtetit po trajtohet për pneumoni bilaterale post Covid me insuficiencë respiratore.
Spitali nga ana e tij nuk ka dhënë ende informacion për gjendjen e Nishanit.
Kujtojmë që gjendja shëndetësore e Nishanit është vendosur në fokusin e mediave edhe para disa vitesh në kohën kur ai ishte president.
Në vitin 2016 në kohën kur Nishani mbërriti tek selia e Erdoganit, pasi zbriti nga makina, dora e tij e majtë nuk lëvizte fare, ndërkaq presidenti turk e ndihmoi të ngjitet në binën pranë ushtrisë pasi edhe këmbën e majtë e lëvizë me vështirësi.
Pas zgjedhjes si Presidenti i Ri i Republikës, Bujar Nishani pati folur hapur edhe për problemin e tij shëndetësor. Ai e ka cilësuar të tejkaluar e madje “estetik”, duke ftuar publikisht edhe mjekun që e ka ndjekur, Mentor Petrelën, të bëjë me dije detaje të sëmundjes.
Njëri nga ta, mjaft i njohur në Shqipëri dhe më gjerë, Mentor Petrela, kishte thënë se specialistët kanë bërë një progres në shërimin e tij.
‘Duke respektuar vullnetin e Presidentit të zgjedhur, i cili ka kërkuar publikimin e gjendjes shëndetësore, sipas shembullit të mjaft liderëve europianë e amerikanë, po thyej sekretin mjekësor. E kam diagnostikuar për kavernome cerebrale përpara disa vitesh, pas i kishte dhënë shqetësime. Për të parandaluar një hemorragji është operuar nga një nga neurokirurgët më të mirë në planet. Konsiderohet i kuruar”, pati thënë Petrela
