Të vegjlit kanë një kalendar të detyrueshëm prej 12 vaksinash, por tashmë ka disa shtesa të tjera. Kalendarit do t’i shtohen edhe tre vaksina të tjera, të cilat parandalojnë sëmundje që kanë shpeshtësi të lartë në popullatën tonë.
Incidenca e kancerit të qafës së mitrës te gratë në Shqipëri është 9.3 për çdo 100 mijë dhe kemi numrin më të lartë të grave të prekura ndër vendet e Mesdheut. Vaksina do të aplikohet te vajzat e vogla për të parandaluar sëmundjen vdekjeprurëse të shkaktuar nga Human papiloma virus dhe që prek gratë në moshën riprodhuese.
Keto vaksina, që shtohen në kalendarin tonë të detyrueshëm, në vende të Bashkimit Europian kanë vite që bëhen.
Silva Bino shprehet se zakonisht bëhen në moshën 12 vjeç. Fëmijët në Shqipëri vaksinohen sapo lindin ndaj tuberkulozit, Hepatitit B, vijojnë me difteri tetanoz, penumokok fruth, rubeolen, poliomelit, rotavirus.
“Shtohen vaksina e kancerit të qafës së mitrës, meningokoku, hepatiti A”, shpjegon Silva Bino.
Vaksinat janë konsideruar një mënyrë tepër efektive në mbrojtjen e fëmijëve ndaj sëmundjeve të ndryshme. Procesi i vaksinimit aplikohet sipas një kalendari të miratuar nga Ministria e Shëndetësisë dhe OBSH-së. Skema e paraqitur përfshin fëmijët e shëndetshëm, duke përjashtuar përkohësisht ose përfundimisht një grup të caktuar fëmijësh. Vaksina është një preparat i cili nxit mbrojtjen e organizmit ndaj baktereve apo viruseve që shkaktojnë sëmundje.
