Në kuadër të një operacioni të zhvilluar nga autoritetet greke, është arrestuar shqiptari Sandër Pema, një emër i njohur për policinë greke për lidhjet e tij me grupe kriminale dhe precedentët penalë.
Ky operacion është pjesë e hetimeve të zgjeruara që lidhen me komunikimet e kapura në platformën “Sky ECC”.
Sandër Pema është i njohur për përfshirjen e tij në aktivitetet kriminale në Greqi. Ai ka qenë anëtar i bandës së Marian Kolajt, një i arratisur nga burgu dhe që u ekzekutua nga policia greke gjatë një përleshjeje të armatosur afër kufirit shqiptar.
Gjatë këtij incidenti, Pema ishte prezent dhe, bashkë me Kolajn, plagosi disa efektivë grekë, të cilët më pas vranë mikun e tij para syve.
Në vitin 2010, Pema pati një tjetër përplasje me armë me policinë greke, duke përfunduar sërish në pranga.
Pas arrestimit, ai u akuzua për përfshirje në një rrjet të trafikut të drogës, lidhur me biznesmenin Jurgen Mollën, i cili gjithashtu u arrestua. Pas daljes nga burgu, Pema organizoi një tjetër rrjet trafikimi me kokainë, por u kap përsëri dhe u arrestua në vitin 2020.
Pema është i njohur për përpjekjet e tij për të dalë nga qelia dhe vazhdimin e aktiviteteve kriminale.
Momentalisht, është e paqartë se kur është liruar pas arrestimit të fundit, por arrestimi i tij i fundit tregon se ai ka qenë pjesë e një grupi kriminal të organizuar që po hetohet nga autoritetet greke.
