Një ngjarje e rëndë tronditi qytetin italian të Tolentinos pasditen e së shtunës, ku një grua shqiptare u vra brutalisht në mes të rrugës nga ish-bashkëshorti i saj.
Viktima është 45-vjeçarja Gentiana Kopili, ndërsa autori i dyshuar është 55-vjeçari Nikollaq Hudhra, me origjinë shqiptare dhe banues në zonën e Perugias.
Sipas autoriteteve italiane, Hudhra kishte ardhur në Tolentino një ditë më parë, duke sjellë qëllimisht një makinë dhe një skuter për të shmangur identifikimin.
Ai e kishte përgatitur sulmin me detaje, duke fshehur një thikë me teh rreth 30 cm nën rrobat e punës. Ngjarja ndodhi në rrugën Benadduci, teksa Gentiana po ecte e vetme dhe fliste në telefon. Hudhra e goditi atë nga pas me thikë rreth dhjetë herë dhe më pas e shqelmoi, edhe pasi ajo kishte rënë përtokë.
Dëshmitarë të rastësishëm panë ngjarjen nga afër dhe disa e filmuan nga dritaret e banesave. Pas sulmit, Hudhra u ul në një stol pranë trupit të pajetë dhe qëndroi aty i qetë, duke u thënë kalimtarëve: “Tani telefononi policinë.” Ai u arrestua pa rezistencë nga forcat e rendit.
Gjatë marrjes në pyetje, Hudhra pranoi se e kishte planifikuar vrasjen. Ai pretendoi se donte të “shpëtonte fëmijët”, duke akuzuar ish-bashkëshorten se synonte t’i helmonte.
“Ishte hera e tretë që përpiqesha ta bëja,” tha ai. Në makinën e tij u gjetën edhe mjete të tjera të ftohta, të mbështjella dhe të fshehura.
Prokuroria italiane ka ngritur ndaj tij akuzën për vrasje të paramenduar, të rënduar nga mizoria dhe fakti që viktima ishte grua. Po shqyrtohet mundësia për të kryer një vlerësim psikiatrik të autorit.
Hudhra ndodhet në burgun Montacuto në Ankona, ku ka kaluar natën në izolim. Seanca për verifikimin e masës së sigurisë pritet të zhvillohet në fillim të javës.
Gentiana punonte si kujdestare dhe, sipas autoriteteve, nuk kishte dhënë shenja të menjëhershme se ndodhej në rrezik.
Kjo vrasje shënon femicidin e 33-të në Itali që nga fillimi i vitit, duke rritur më tej shqetësimin për dhunën ndaj grave në vend.
