Libri “Gjeografia e Republikës së Maqedonisë” për vitin e II-të të gjimnazit të refromuar ka nxitur një debat të ashpër. Në këtë libër paraqitet një version tjetër për prejardhjen e shqiptarëve, sepse në të shkruhet se shqiptarët janë me origjinë nga Maqedonia e Veriut, por u bënë shqiptarë pas pushtimit osman.
Ky libër, i cili është shkruar mbi dezinformata, thotë se shqiptarët e Maqedonisë e kanë prejardhjen nga çerkezët, romët dhe turqit.
“Prej shqiptarëve të Maqedonisë ekzistojnë fise që e llogarisin vetveten si autokton. Kryesisht ata janë popullsi maqedone që gjatë periudhës së sundimit turk e kanë pranuar fenë islame dhe gradualisht janë shqiptarizuar. Midis tyre ka dhe ndonjë fis që ka prejardhjen turke, rome ose çerkeze”, thuhet në faqen 99 të këtij libri.
Por lidhur me këtë ngjarje reagoi dhe kryeministri i Maqedonisë së Veriut, Zoran Zaev. Kryeministri premtoi zgjidhje sistematike për këtë çështje si dhe largimin e tërësishëm nga programi mësimor të librit “Gjeografia e Maqedonisë”, në kuadër të këtyre reformave, Zaev theksoi se do të ketë ndryshim edhe të planprogrameve mësimore. Ai theksoi se është i vetëdijshëm që ky libër përdoret që nga viti 2002 ndërsa përmbajtja e tillë doli në pah në vitin 2018.
E dyta herë për të njëjtin mandat kryeministri Zaev premtoi se do të ndërmerren hapa konkret në heqjen prej përdorimi të librit “Gjeografia e Maqedonisë”, libër ky, që ka përmbajtje fyese kundrejt shqiptarëve dhe jo vetëm. Ai tha se në reformat të cilat po realizohen aktualisht janë përfshirë edhe ndryshimet e disa prej librave, pasi që siç theksoi Zaev, ky libër nuk është i vetmi me përmbajtje të tillë fyese kundrejt një nacionaliteti.
“Për shkak se në planin e reformave të parapara në arsim, janë përfshirë edhe ndryshimi i librave. Nuk mundet që në qoftë se nuk keni të përgatitura përmbajtje të re mësimore, në cilëndo qoftë lëndë, të heqin lëndën menjëherë që të mund të ndryshohen përmbajtjet, ato përmbajtje veçse ndryshohen, dhe një nga hapat e rëndësishme është sigurimi i librave kualitativ në shkollimin fillor dhe të mesme”– tha Zaev.
