Mbrëmjen e sotme kryeministri Edi Rama i ftuar në ‘Open’ në Top Channel, komentoi fjalët e ish-kryeministrit Sali Berisha për ndihmën që i takon Shqipërisë të japë ndaj Ukrainës.
“Pas 4 muajsh, Sali Berisha u rikthye në Kuvend dhe u shpreh se Shqipëria duhet të çojë municione në Ukrainë. Dëgjova disa dokrra për Ukrainën, por në ditët në vijim do të dëgjoni diçka që do të ishte e pabesueshme për rolin e Shqipërisë,” tha Rama.
Ndërsa më herët Berisha në Kuvend u shpreh: “I shpreh solidaritetin tim të plotë në emër të PD, kombit ukrainas. Jam këtu për të ngritur zërin, për të ndihmuar Ukrainën që kërcënohet nga një barbari e Kremlinit.
Shqipëria duhet të bëjë gjithçka për të ndihmuar këtë vend. Të paktën fishekë dhe municione mund t’u dërgohen atyre, por argati i Beogradit jo më kot hesht. Ju zotërinj deputetë duhet të ngrini zërin se përfaqësoni PD jo Lul bravën”.
Kujtojmë se Ukraina i ka bërë thirrje Gjermanisë që të braktisë politikën e saj të bllokimit të furnizimeve me armë në vend, mes frikës së një aksioni ushtarak nga Rusia, transmeton Anadolu Agency (AA).
Ambasadori i Ukrainës në Gjermani, Andrij Melnyk, mbrëmë për transmetuesin publik ARD tha se forcimi i aftësive mbrojtëse të Ukrainës është bërë i nevojshëm për të penguar Rusinë nga agresioni i mëtejshëm.
