Shqipëria kishte rritjen më të lartë të vdekjeve në Europë në vitin 2020, në raport me mesataren e vdekjeve në periudhën 2015-2019, kjo gjë është konfirmuar edhe nga një grafik i fundit të publikuar nga Fondi Monetar Ndërkombëtar.
Presidenti Ilir Meta ka reaguar përmes një statusi në “Facebook” lidhur me raportin e FMN-së që e konsideron Shqipërinë si vendin me vdekshmëri më të lartë në Europë.
Ai i bën thirrje Komitetit Teknik të Ekspertëve dhe autoriteteve të analizojnë me përgjegjësi këto të dhëna, pasi duke zbuluar dhe eliminuar pikat e dobëta, mund të ketë ndërhyrje urgjente me qëllim parandalimin e vdekjeve të tjera.
Duke e konsideruar raportin si alarmant, ai kërkon që raporti të merret shumë seriozisht.
Postimi i plotë:
Renditja e Shqipërisë si vendi me vdekshmëri më të lartë në Europë nga COVID-19 sipas FMN, është një fakt alarmant, që duhet të merret shumë seriozisht, për më tepër që vendi ynë është ende me moshë mesatare më të re të popullatës krahasuar me vendet e tjera të BE.
I bëj thirrje, Komitetit Teknik të ekspertëve dhe autoriteteve të analizojnë me përgjegjësi këto të dhëna, si të rishihen me përgjegjësi të gjitha protokollet, masat për parandalimin dhe trajtimin e pandemisë, në mënyrë transparente dhe bashkëpunuese me qytetarët.
Duhen zbuluar dhe eliminuar pikat e dobëta dhe duhet ndërhyrë urgjentisht për të parandaluar këtë shkallë të lartë të humbjeve të jetëve.
Jemi ende në valën e pandemisë dhe ndërhyrjet përmirësuese dhe korrigjuese të masave antiCovid duhet të ndërmerren sa më parë.
