Qeveria Shqiptare ka filluar përpjekjet e saj për të sjellë në Shqipëri, familjarët dhe fëmijët e luftëtarëve shqiptarë, që kanë luftuar në Siri për krah grupit terrorist ISIS.
Një burim pranë Policisë së Shtetit tha se, nëpërmjet kanaleve diplomatike të Ministrisë së Punëve të Jashtme, ministrisë së Brendshme, asaj të Drejtësisë dhe SHISH-it, ka filluar të bisedoi me partnerët ndërkombëtarë me qëllim që shumë shpejt në Tiranë, të riatdhesohen familjet shqiptare që jetojnë në Siri.
Shqipëria po mban kontakte të vazhdueshme me disa shoqata humanitare si “Kryqi i Kuq” dhe segmente të inteligjencës amerikane me qëllim riatdhesimin e shqiptarëve që mbahen të izoluar në kampin “Al-Hol” në Siri. Në këtë operacion Shqipëria, duhet të marrë të gjitha përgjegjësitë juridike, politikë, ekonomike dhe sociale, për të trajtuar në mënyrën e duhur brenda kuadrit ligjor, çdo person që do riatdhesohet.
Sipas burimeve të ‘shqiptarja.com’ në kampin “Al-Hol” ndodhen dhe 6 fëmijë bebe, që kanë lindur në Siri, ndërkohë jetojnë plot 50 shtetas shqiptarë, kryesisht fëmijë dhe gra, që janë kapur gjatë luftimeve mes forcave kurde dhe dy organizatave terroriste ISIS dhe Al-Nustra që vepronin në Siri dhe Irak.
Të gjithë shqiptarët që mbahen të izoluar në këtë kamp, kanë shkuar në Siri, për shkak se bashkëshortët dhe baballarët e fëmijëve, kanë qënë rekrutë të dy organizatave terroriste.
Sipas burimeve në këtë kamp jetojnë 73.000 fëmijë dhe gra nga shumë kombe, ku veç shqiptarëve, ka dhe kosovarëve e shqiptarë nga Maqedonia.
Sipas të dhënave zyrtare pranë Komisionit Europian, mes viteve 2012-2015 janë 144 shqiptarë që janë nisur nga Shqipëria për të të luftuar në Siri. Ndërkohë sipas institucioneve shqiptare pas vitit 2015 nuk ka pasur më nisje drejt zonave të luftës.
