Prej rreth dy javësh Shqipëria është duke u përballur me koronavirusin, teksa deri më tani numri i të prekurve ka shkuar në 70, ndërsa janë shënuar edhe dy viktima.
Epidemia pritet të shkaktojë dëme të mëdha ekonomike, ndërsa kryeministri Edi Rama bëri dje publik planin financiar, në ndihmë të bizneseve dhe individëve.
Shefi i qeverisë njoftoi mbrëmë, se ka pezulluar disa koncesione dhe ka përgjysmuar rrogat e deputetëve e anëtarëve të Këshillit të Ministrave, para që do të shkojnë në ndihmë të përballimit të situatës së krijuar nga koronavirusi.
Teksa ekonomia shqiptare është më e rrezikuar se kurrë, kryebashkiaku i Tiranës, Erion Veliaj ka hapur një tender për suvenire.
Bazuar në dokumentin e publikuar në Agjencinë e Prokurorimeve Publike më 13 mars të 2020-ës, pas konfirmimit të rasteve të para me COVID-19, Bashkia më e madhe në vend kërkon të blejë suvenire.
Fondi limit i tenderit është 2.496.200, shumë kjo e përafërt me koston e një ventilatori, pajisje kjo jetike për të prekurit nga koronavirusi.
Edhe pse pas shpalljes së tenderit situata në vendin tonë është përkeqësuar, nuk është marrë asnjë masë nga Bashkia për të anuluar tenderin.
Vetëm pak momente para se Rama të prezantonte planin ekonomik, për këtë tender është bërë një njoftim i ri, duke u shtyrë hapja e ofertave më 24 mars, ndërsa duhet të anulohej.
Papërgjegjshmëria e Bashkisë së Tiranës nuk përfundon këtu, pasi më 12 mars ka shpallur një tender për mbikëqyrjen e punimeve për rikonceptimin e Kopshtit Zoologjik, me shifrën 9.958.229, shumë më e lartë sesa ajo e suvenireve.
