Pas anëtarësimit të Shqipërisë në Këshillin e Sigurimit në OKB ka reaguar dhe ambasadorja Yuri Kim e cila përmes një postimi në Twitter shkruan se SHBA dhe vendi ynë do të ulen tashmë si kolegë në një nga tavolinat më të rëndësishme në botë.
“Ju mirëpresim!”-shkruan Kim.
Kujtojmë se nga sot, Shqipëria do të jetë anëtare e përkohshme në Këshillin e Sigurimit në OKB, duke marrë pjesë kështu për 2 vite rradhazi në të njëjtën tryezë me shtetet e përhershme anëtare të Këshillit të Sigurimit.
Postimi i ambasadores Yuri Kim:
Ju mirëpresim 
në Këshillin e Sigurimit të OKB-së! Krenar që do të ulemi së bashku si kolegë në një nga tavolinat më të rëndësishme në botë.
Kujtojmë se duke filluar nga 1 janari 2022, Shqipëria do të ulet për dy vjet rresht në një nga pesëmbëdhjetë ulëset e organit të OKB për menaxhimin e paqes dhe sigurisë ndërkombëtare. Zgjedhja në Këshillin e Sigurimit, për herë të parë pas 66 vitesh anëtarësim në OKB, përfaqëson sfidë madhore, por dhe një mundësi të shkëlqyer për Shqipërinë. Shqipëria u paraqit si kandidaturë konsensuale e Grupit të Vendeve të Evropës Lindore.
Zgjedhja e Shqipërisë si anëtare jo e përhershme e Këshillit të Sigurimit në Kombet e Bashkuara, është një prej arritjeve më të mëdha në diplomacinë ndërkombëtare për vendin. Shqipëria u pranua anëtare e OKB-së më 14 dhjetor 1955 dhe pas 66 vitesh anëtarësie, u votua për herë të parë për të qenë anëtare e përkohshme e Këshillit të Sigurimit të OKB-së për një mandat 2-vjeçar. Mandati fillon më 1 janar 2022.
