Shqipëria mban vendin e fundit në Europë për pagën minimale, me vetëm 408 euro bruto në muaj në fund të qershorit. Raporti i fundit i Eurostat për vitin 2025 nxjerr qartë në pah hendekun e thellë mes vendit tonë dhe pjesës tjetër të kontinentit.
Në rajon, situata është dukshëm më e favorshme. Në Malin e Zi, punonjësit nuk mund të marrin më pak se 670 euro, në Serbi paga minimale arrin në 618 euro, ndërsa në Maqedoninë e Veriut 584 euro. Në Bosnjë varion nga 500 deri në 660 euro dhe në Kosovë është vendosur me ligj 350 euro. Megjithatë, për këto dy shtete shifrat nuk janë përfshirë zyrtarisht në raportin e Eurostat.
Ndërkohë, në Shqipëri paga minimale nuk është rritur që nga viti 2023, duke i lënë qytetarët përballë çmimeve gjithnjë e më të larta. Rreth 40% e të ardhurave të një familjeje shqiptare shkojnë për ushqime, çka tregon se fuqia blerëse po zbehet çdo ditë.
Në nivel europian, kontrasti është tronditës: në Luksemburg paga minimale arrin 2700 euro, në Gjermani 2160 euro, ndërsa edhe vendi më i varfër i BE-së, Bullgaria, e ka të përcaktuar në 550 euro. Shqipëria mbetet prapa, duke i vendosur punëtorët e saj në kushte më të vështira se çdo vend tjetër në kontinent.
