Kryeministri Edi Rama paralajmëroi të dielën (3 tetor) për krizën e re energjetike që e pret vendin. Rama tha se kjo krizë ka nisur nga tregjet më të mëdha të botës dhe përmendi Kinën, Korenë e Jugut, Shtetet e Bashkuara, Britaninë e Bashkimin Europian.
“Dukuria e rritjes marramendëse të çmimit të gazit e të karbonit në të gjitha tregjet ndërkombëtare, si edhe trendi i fortë i rritjes së çmimit të naftës, shoqëruar me një rritje të përgjithshme çmimesh të prodhimeve të konsumit të përditshëm, qëndrojnë sot para të gjitha vendeve, si siluetat e një ushtrie armike në horizontin e dimrit të vështirë që bota ka përpara”, tha Rama.
Ndër të tjera, Rama tha se është zvogëluar edhe prodhimi i energjisë nga burimet alternative.
“Rrjedhimisht, mungesa e prodhimit të energjisë alternative, ka ndikuar në rritjen e kërkesës dhe çmimeve të gazit dhe të qymyrit. Në Gjermani, mbyllja e tre reaktorëve të tjerë bërthamorë, si pjesë e programit të stopimit të prodhimit të energjisë nukleare, ka reflektuar në rritje të kërkesës për energji edhe nga burimet natyrore të parinovueshme”, deklaroi kryeministri.
Po pa u ndalur specifikisht te Shqipëria, Rama harroi të thonte se vendi ynë ka burime të mjaftueshme për t’u furnizuar me energji e për të mos u ndikuar nga kriza globale.
Aktualisht janë 47 HEC-e të bllokuara nga Agjencia e Zhvillimit të Territorit, ndërkohë që dhjetëra të tjerë janë të bllokuar nga Ministria e Infrastrukturës dhe Energjisë.
Pra në këto vite, qeveria ka patuar vetëm politika bllokuese të HEC-eve që rrjedhimisht një ditë do të sillnin rritje të çmimit të energjisë. Shqipëria prodhon deri në 8.5 milionë MWh energji elektrike dhe konsumohen mesatarisht 7.5 MWh.
Pra e kundërta duhet të ndodhte me çmimet. Nëse në botë çmimet do të rriten, Shqipëria duhej të përfitonte nga kjo rritje, pasi ka kapacitetet edhe për të shitur energji. Por me sa duket, nga gjithë këto lëvizje janë bërë qëllimisht në mënyrë që kompanitë që tregtojnë energjinë elektrike, të përfitojnë sa më shumë, dhe si gjithmonë janë qytetarët shqiptarë ata që i vuajnë pasojat.
Thënë ndryshe, rritja e çmimeve në Shqipëri nuk ka të bëjë me një trend global të rritjes së çmimeve të energjisë, por me një keqmenaxhim të situatave të mëparshme që do të çonin në kriza të pashmangshme, siç është ajo që ka paralajmëruar kryeministri.
