Tarifat e papritura të vendosura nga Presidenti Trump kanë shkaktuar një pasiguri të madhe lidhur me çmimet e mallrave të importuara në SHBA, duke e bërë të paqartë se cilat produkte do të preken më shumë në secilin vend.
Sipas një përmbledhjeje të gazetës amerikane The New York Times, SHBA mbështetet në importet nga 140 vende, ku tarifat e herëpashershme kanë krijuar paqartësi të thellë për kostot e mallrave.
Në këtë listë figuron edhe Shqipëria, e cila siguron rreth 3% të materialeve që përdoren për përpunimin e hekurit.
Artikulli thekson se importet kryesore në SHBA nga shumë vende janë nafta dhe gazi, pajisjet elektronike, makinat dhe produktet farmaceutike.
Në mënyrë specifike, pajisjet elektronike janë eksporti më i madh i Kinës drejt SHBA-së, por Amerika importon sasi të konsiderueshme të këtyre pajisjeve edhe nga vende të tjera. Një fakt interesant është se pothuajse të gjitha karrocët për fëmijë që hyjnë në SHBA janë nga Kina.
Nga ana tjetër, Zvicra siguron pothuajse të gjitha orët e importuara në SHBA që janë prej metali të çmuar.
Etiopia kontribuon me rreth 2% të veshjeve të thurura për foshnje të importuara në SHBA, duke e bërë këtë produkt më të rëndësishmin në eksport për atë vend drejt SHBA-së.
Tabela në artikull paraqet listën e artikujve kryesorë nga secili prej 140 partnerëve tregtarë të SHBA-së, ku shfaqet qartë varësia e Amerikës nga këto importe.
