Kombëtarja shqiptare do të përballet me Ukrainën mbrëmjen e së martës, në ndeshjen e fundit të Ligës së Kombeve.
Kjo sfidë është vendimtare, pasi Shqipëria synon fitoren me çdo kusht për të ruajtur shpresat për vendin e parë në grupin B1.
Pas barazimit me Çekinë, kuqezinjtë nuk e kanë më në kontroll fatin e kreut të grupit.
Megjithatë, një fitore është thelbësore, ndërsa shpresat do të varen edhe nga rezultati i ndeshjes Çeki-Gjeorgji, ku një barazim do t’i favorizonte shqiptarët.
Në stadiumin “Air Albania” pritet një përballje intensive, pasi të dyja skuadrat kanë nevojë për rezultat pozitiv.
Si gjithmonë, kombëtarja shqiptare do të ketë mbështetjen e zjarrtë të tifozëve, me stadiumin e mbushur në kapacitet të plotë, pasi të gjitha biletat janë shitur.
Synimi për vendin e parë vjen me një rrezik të madh: një humbje ndaj Ukrainës mund ta shtyjë Shqipërinë drejt vendit të fundit në grup, duke qenë se të gjitha skuadrat ndodhen shumë pranë njëra-tjetrës me pikë.
Pavarësisht këtyre skenarëve, trajneri Silvinjo mbetet i vendosur.
Në konferencën për shtyp, ai deklaroi qartë se Shqipëria futet në fushë vetëm për të fituar, duke e bërë të qartë qasjen e tij ambicioze ndaj sfidës.
