Kryeministri Edi Rama ka kërkuar mandatin e tretë me një premtim “ të rrallë”, ujë të pijshëm 24 orë në çdo bashki të vendit.
Në shekullin e 21 dhe në aspirata për tu anëtarësuar në Bashkimin Europian, Kryeministri jep një premtim që duhej siguruar shumë vite më parë.
Në një kohë që pretendon edhe katër vite të tjera në pushtet, veçse kërkesës së votave për të përmbushur premtimet e vjetra, Rama garanton se çështja e ujit nuk do të jetë më temë politike, pasi buxheti do të rritet me 40%, ndihmuar dhe nga qeveria gjermane, zviceriane dhe franceze.
“24 orë ujë brenda mandatit të tretë në Tiranë, ku përfshij Kamzën dhe Vorën. E njëjta gjë do të ndodhë me Vlorën, Shkodrën, nuk ka pasur 24 orë ujë kurrë dhe sot ka një përmirësim të ndjeshëm të furnizimit me ujë përfshirë Elbasanin, Kukësin dhe krejt vijën turistike nga Velipoja në Sarandë. Me rritjen e buxhetit për ujin me 40% ne do të garantojmë më në fund 100% ujë të pijshëm 24 orë në zonat urbane dhe uji i pijshëm nuk do të jetë më temë e fushatave elektorale. Pak shifra ndër shumë që mund të sillja dhe më pas mund të më ndihmojnë qoftë për ujin, qoftë për energjinë, 3 menaxherë të cilët janë persona që kanë luajtur rol të rëndësishëm në këto sektorë lidhur me furnizimin me ujë në këtë rast shifrat janë: Në vitin 2013, në rang territori, ne kishim 12 orë ujë në ditë, në dhjetor të këtij viti do të kemi 18 orë ujë në ditë dhe në mbyllje të mandatit të tretë 24 orë në ditë.”, u shpreh Rama.
