Ditën e sotme Ambasada e Shteteve të Bashkuara të Amerikës ka uruar Shqipërinë për anëtarësimin e saj në Këshillin e Sigurimit të Organizatës së Kombeve të Bashkuara.
Përmes një mesazhi në faqen zyrtare të “Facebook” ambasada thekson se bashkë me Shqipërinë të trajtojnë se bashku sfidat me të cilat përballet sot bota.
Mesazhi:
“🇦🇱 | Urime Shqipërisë për një arritje të jashtëzakonshme, fillimin e anëtarësimit të saj në Këshillin e Sigurimit të Organizatës së Kombeve të Bashkuara, për herë të parë në histori. Shtetet e Bashkuara mirëpresin të shërbejnë së bashku me Shqipërinë në Këshillin e Sigurimit të OKB-së, për të trajtuar sfidat më të ngutshme me të cilat përballet sot bota jonë.”, thuhet në njoftimin e ambasadës.
Kujtojmë se Shqipëria duke nisur nga sot, do të ulet si anëtare jo e përhershme e Këshillit të Sigurimit të Organizatës së Kombeve të Bashkuara (OKB). Vendi ynë është zgjedhur për herë të parë anëtar jo i përhershëm në Këshillin e Sigurimit të OKB-së për periudhën kohore 2022-2023.
Duke filluar nga 1 janari 2022, Shqipëria do të ulet për dy vjet rresht në një nga pesëmbëdhjetë ulëset e organit të OKB për menaxhimin e paqes dhe sigurisë ndërkombëtare. Zgjedhja në Këshillin e Sigurimit, për herë të parë pas 66 vitesh anëtarësim në OKB, përfaqëson sfidë madhore, por dhe një mundësi të shkëlqyer për Shqipërinë. Shqipëria u paraqit si kandidaturë konsensuale e Grupit të Vendeve të Evropës Lindore.
