Një takim dyditor u zhvillua në Tiranë mes dy delegacioneve shqiptare dhe britanike, për të diskutuar mbi bashkëpunimin në luftën kundër krimit të rëndë dhe të organizuar.
Takimi u udhëhoq nga Zëvendës Ministri i Brendshëm, Besfort Lamallari, dhe përfaqësues nga Ministria e Drejtësisë, Policia e Shtetit dhe institucione të tjera shqiptare, ndërsa pala britanike përfaqësohej nga Zëvendës Sekretari i Dytë i Zyrës së Brendshme, Simon Ridley, dhe Ambasadori britanik në Shqipëri, Nick Abbott.
Në takime u vlerësua bashkëpunimi mes dy vendeve dhe u shpreh angazhimi për intensifikimin e këtij bashkëpunimi, veçanërisht në përdorimin e teknologjisë më të fundit për luftën kundër krimit ndërkufitar.
Ambasadori Nick Abbott theksoi rëndësinë e dialogut të vazhdueshëm, i cili do të ndihmojë në reduktimin e migracionit të paligjshëm dhe luftën kundër krimit të organizuar.
Po ashtu, u miratua një plan veprimi për të adresuar kërcënimet nga trafikimi i narkotikëve, korrupsioni dhe flukset e paligjshme financiare, duke forcuar bashkëpunimin dypalësh në këto fusha.
