Mëngjesin e sotëm në Sarandë hoteli “Bizant” shpërtheu nga një sasi eksplozivi e vendosur ndaj tij. Por përveç shembjes së hotelit 2 katësh, ngjarja ka ndikuar negativisht edhe tek banorët dhe ndërtesat afër tij. Fqinjët shprehen se në banesat përgjatë vijës bregdetare në Sarandë, pranë hotelit, ka xhama e orendi të thyera.
Gjithashtu ata rrëfejnë se fillimisht ata kanë menduar se mos ishte tërmet, janë trembur dhe në momentin që kanë dal jashtë u përballën me një tym që nuk të lejontë të shikoje asgjë. “U hodha nga krevati, mendova se ishte tërmet, dal në ballkon dhe shoh xhama të thyer. Zbritëm poshtë, ballkoni dhe shkallët e shtëpisë u mbushën me tym, nuk shikoje asgjë. Ndjemë një tronditje, ishte një tmerr. Mirë që ishte herët dhe nuk kishte njerëz jashtë se do të kishte të lënduar. Shkova në shtëpinë e një komshiu që jeton në Francë. Çdo gjë ishte e thyer, xhama, korniza. Gjithë ana e detit është e dëmtuar”, thotë një banore për Top Channel.
Pas hedhjes në erë të hotelit 2 katësh në Sarandë, policia ka shoqëruar disa persona në komisariat. Ndërkohë, pritet që të mbërrijnë në vendngjarje edhe forcat xheniere nga Tirana, për të përcaktuar llojin dhe sasinë e lëndës plasëse.
