Zoran Millanovic, president i Kroacisë, ka mbajtur një konferencë për media ku ka folur për objektin fluturues pa pilot që është rrëzuar mbrëmë në Zagreb.
“E ndjej detyrim t’i drejtohem opinionit. E dimë çfarë objekti është dhe nga ka ardhur. Ajo ka fluturuar mbi Hungari për 40 minuta dhe shtatë minuta tjera i ka kaluar mbi territorin e Kroacisë. Është një incident serioz dhe ashtu po e trajtojmë”, tha Millanovic.
“I bëjë thirrje qytetarëve të jenë të qetë. Vlerësojmë se ky akt nuk ishte drejtuar kundër Kroacisë. Ky është një incident dhe duhet t’i shqyrtojmë çështjet procedurale. Kjo fluturake ka madhësinë e një aeroplani që peshon mbi 6 tonelata që u rrëzua në Zagreb”, shtoi presidenti kroat.
I pari i shtetit kroat ka theksuar se radarët e kishin detektuar objektin fluturues, por që nuk kanë mundur të bëjnë asgjë pasi ishte kohë shumë e shkurtër.
“Kam biseduar sot me kryeministrin. Po zhvillohen hetimet, ku janë të përfshira edhe shërbimet e inteligjencës, e deri më tani kemi mësuar se objekti fluturues ka ardhur nga Ukraina dhe është rrëzuar në Kroaci pasi ka mbetur pa karburant”, ka thënë ndër tjera Millanoviq.
Është theksuar se objekti fluturues ka humbur kontrollin, por që sipas tij është e pakuptimtë sesi një fluturake jo edhe aq e sofistikuar, të mund të ketë kaluar disa orë mbi vendet anëtare të NATO-s dhe askush të mos e vërej.
