Një shpërthim ka ndodhur mbrëmjen e djeshme në lagjen Ish-Grumbullimi në Fushë-Krujë, ku një sasi prej rreth 200 gramësh eksploziv u vendos në pjesën e jashtme të një fabrike sallami, pronë e shtetasit D.M.
Si pasojë e shpërthimit, janë shkaktuar dëme materiale, megjithatë fatmirësisht nuk ka pasur të lënduar, pasi në atë moment në fabrikë nuk ndodhej asnjë person.
Fabrika është një biznes familjar që operon prej 30 vitesh dhe drejtohet nga anëtarët e familjes D.M.
Sipas burimeve, pronari i fabrikës nuk ka raportuar ndonjë konflikt të mëparshëm që mund të ketë çuar në këtë ngjarje.
Aktualisht, autoritetet po hetojnë për të zbuluar shkakun e shpërthimit dhe për të identifikuar autorin, i cili ka shkaktuar tronditje te pronarët e fabrikës dhe banorët e zonës.
