Një shpërthim i fuqishëm ka ndodhur pak më parë në zonën e Komunës së Parisit në Tiranë. Mësohet se një makinë ka shpërthyer pranë qendrës tregtare “Kristal”. Dyshimet e para janë se makinës i ishte vendosur tritol, pasi shpërthimi ka qenë mjaft i fortë. Gjatë momentit të shpërthimit mjeti ka qenë i parkuar në parkingun e qendrës tregtare dhe nuk ka pasur asnjë person në të dhe është ende e paqartë nëse ka pasur apo jo persona të lënduar që mund të kenë qenë kalimtarë të rastit.Policia ndodhet në vendngjarje dhe ka rrethuar zonën, ndërsa ka mbërritur edhe ambulanca.
Ndërkohë bëhet me dije se mjeti i shpërthyer është në pronësi të një prokurori të Prokurorisë së Përgjithshme, Arjan Muça. Po bashkëshortja e Muçës është gjyqtare në gjykatën Administrative të Gjirokastrës.Makina që ka shpërthyer ka qenë tip “Mercedes Benz” me ngjyrë të zezë, ndërsa në vendin e ngjarjes kanë mbërritur edhe forcat zjarrfikëse.
Policia nuk ka dalë ende me një njoftim zyrtar për ngjarjen e ndodhur rreth orës 19:30 të mbrëmjes, por nisur edhe nga shpërthimi i fuqishëm makinës mund t’i jetë vendosur tritol. Nuk dihet nëse ngjarja ka të bëjë me ndonjë çështje të ndjekur nga prokurori, apo bashkëshortja e tij.
