Pothuajse shumica e të burgosurve në Institucionet e Vuajtjes së Dënimit në vend, kanë shpërthyer në revoltë për shkak të pakënaqësive dhe vendimeve të marra nga Drejtoria e Përgjithshme e Burgjeve për masat e reja anti-covid, duke mos lejuar takimet e të burgosurve me familjarët dhe avokatët e tyre.
Pakënaqësi ka patur edhe për regjimin e ri Bis-41 nëpër burgje, të vendosur nga Ministria e Drejtësisë, ku ndër të tjera përfshihet edhe përgjimi brenda ambjenteve të qelive me anë të çimkave.
Pas dhjetëra të dënuarve në Rrogozhinë, Peqin, Reç, Shënkoll dhe Burrel raportohet se në grevë kanë hyrë edhe 150 të burgosur të 313-ës në Tiranë.
Të burgosurit e burgut 313-të kërkojnë t’i lejohen takimet me familjaret. Ata ankohen edhe për mungesën e kushteve higjienike, cilësinë e ushqimit, si dhe sjellja e ashpër me kërcënime dhe përgjimet brenda ambienteve të IEPV-së ku vuajnë dënimin.
Të dënuarit shprehen se dhomat e tranzitit janë me (çimka) insekte, si dhe ankohen për masat e ashpra si izolimi që iu bëhet atyre në rast se flasin dhe ankohen. / GazetaReforma.com/
