Presidenti Ilir Meta ka thënë se gjoba që Shqipëria ka për t’i paguar Francesco Becchetti-t është vetëm fillimi. Ai ka shpërndarë artikullin e Monitor.al që analizon të ardhurat buxhetore në Shqipëri që nuk kalojnë 27% të PBB-së (10 pikë më pak se mesatarja e Europës)/
Me gjobën që Shqipëria duhet t’i paguajë Becchetti-t, mund të ishin blerë vaksina Pfizer të mjaftueshme për të gjithë popullatën (nëse do kishte nxituar t’i blinet që në fillim, ashtu si Izraeli që i siguroi për 25 dollarë/vaksina.
Mbi të gjitha vendimi për Becchetti-n i paraprin një sërë vendimesh të tjera. Në radhë janë dhe shumë çështje të tjera arbitrazhi, që kanë një probabilitet të lartë për t’u humbur (gjykatat ndërkombëtare të arbitrazhit priren që të mbrojnë sipërmarrësit dhe t’u lënë qeverive kostot e vendimeve të tyre politike). Bashkimi i kompanive “Copri” dhe “Aktor”, të cilat ishin të angazhuara në ndërtimin e autostradës Tiranë-Elbasan, ka arritur të fitojë në fazën e parë një dëmshpërblim prej 45 milionë dollarësh. Kompania italo-japoneze, “Dondi Kubota”, e cila zbatoi projektin impiant të përpunimit dhe pastrimit të ujërave të zeza të Tiranës, pretendon 90 milionë euro dëme për ndërprerje kontrate.
Statusi i Metës:
Zbrazja e buxhetit për të paguar Beçhetti-n është shpërdorim kriminal i parave të shqiptarëve.
Është një grabitje e të ardhurave buxhetore më të ulëta në rajon në raport më PPB (27%) të cilat janë 10 pikë më poshtë se mesatarja europiane.
Dhe nuk është vetëm Beçhetti. Ai është vetëm fillimi, sepse në radhë janë edhe plot 235 milionë euro me probabilitet të lartë për t’u paguar si dëmshpërblim nga papërgjegjshmëria dhe shpërdorimi.
Prandaj 25 Prilli është referendum popullor për të çuar para drejtësisë, shpërdoruesit e parave të shqiptarëve.
