Gjykata Themelore në Prishtinë ka shpallur fajtorë dhe ka dënuar me nga një vit burgim ish-kryeministrin Agim Çeku dhe nëntë persona të tjerë të përfshirë në rastin e njohur si “Veteranët”.
Të dënuarit janë, Rrustem Berisha, Shkumbin Demalijaj, Sadik Halitjaha, Qelë Gashi, Shukri Buja, Ahmet Daku, Faik Fazliu, Fadil Shurdhaj dhe Xhavit Jashari.
Ndërkohë, dy të akuzuar të tjerë, Nuredin Lushtaku dhe Smajl Elezaj, janë shpallur të pafajshëm dhe janë liruar nga akuza, me arsyetimin se nuk kishin cilësinë e personit zyrtar në kohën e kryerjes së veprës.
Sipas aktgjykimit të lexuar nga gjykatësi Bahtiri, të dënuarit janë shpallur fajtorë për veprën penale të “Keqpërdorimit të detyrës apo autoritetit zyrtar”, sipas nenit 422 të Kodit Penal të Kosovës.
Të gjithë të akuzuarit ishin pjesë e Komisionit Qeveritar për Njohjen dhe Verifikimin e Statusit të Dëshmorit të Kombit, Invalidit, Veteranit, Pjesëtarit dhe të Internuarit të Luftës së UÇK-së.
Prokuroria Speciale e Kosovës i akuzon se gjatë kohës që ushtronin funksione zyrtare, kanë keqpërdorur detyrën duke përfshirë persona që nuk e meritonin statusin e veteranit të luftës, duke i shkaktuar dëm buxhetit të shtetit në shumën mbi 88 milionë euro.
