1 qershori do të sjellë edhe më shumë liri për qytetarët pas një periudhe të gjatë në karantinë.
Interesi për të rinisur palestrën ka qenë i madh nga shumë qytetarë dhe këtë e ka thënë edhe një instruktor palestre.
Iliri është shprehur në një intervistë nga “Abc News” se interesi nga të apasionuarit pas stërvitjeve ka qenë i lartë dhe gjithmonë pyetja që i kanë drejtuar në rrjetet sociale apo edhe në celular, ka qenë se kur do të hapen palestrat.
“Ka pasur një interes të madh te klientëve besnikë që bëjne prej vitesh stërvitje.
Ata kanë bëre pak vetë stërvitje në mënyra rrethanore në shtëpi apo në natyrë kur është lejuar.
Prej shumë vitesh merremi me këtë punë, na kanë munguar klientët dhe mezi po presim të rikthehen”, thotë Ilir Logu, instruktor palestre.
Tashmë edhe pse palestrat do të hapen, ato do duhet të zbatojnë protokollet e sigurisë në mënyrë rigoroze.
“Faktikisht pas kësaj periudhe kanë ndryshuar shumë gjera.
Do ruajme shumë pjesen e distancimit, pjesën e dezinfektimit, palestra do dezinfektohet gjithë kohës siç rekomandohet nga Ministria e Shendetësisë”, thotë ai.
Përdorimi i ambienteve të përbashkëta siç janë dushet, janë pjesa disi më delikate, ndaj instruktorët e palestrave rekomandojnë që ato të evitohen sa më shumë të jetë e mundur.
“Mund të vijnë me rroba palestre dhe të kthehen po prapë ashtu pa i përdorur shumë dushet, pavarësisht se ato do dezinfektohen që të ketë kushte sa më të mira higjienike”, thotë Logu.
Teksa palestrat dhe shumë aktivitete të tjera do rihapen prej të hënës së 1 qershorit, një fat të tillë nuk do ta kenë frekuentuesit e jetës së natës, të pishinave, kinemave, teatrove, të paktën deri më 23 qershor.
