Prokuroria e Tiranës ka mbyllur së fundmi operacionin e quajtur “Mashtrimi”, ku janë marrë masa ndaj katër personave të dyshuar për shkaktimin e një dëmi prej 53 milionë lekësh nëpërmjet shmangies së detyrimeve tatimore. Shtetasi S.M. është vendosur në arrest në burg, ndërsa shtetasit Z.R., E.S., dhe P.K. janë urdhëruar të paraqiten rregullisht në policinë gjyqësore.
“Në bazë të provave të grumbulluara, u zbulua se tre kompani u themeluan për të mundësuar importet pa fatura, duke lejuar kështu tregtarët të shmangin taksat dhe të mos deklarojnë të ardhurat e tyre reale. Këto kompani, të cilat vepronin si ‘nipte shëtitës’, i kanë shkaktuar shtetit një dëm prej 53 milionë lekësh,” thotë Prokuroria.
Hetimet tregojnë se S.M. ka përdorur të dhënat personale të Z.R., E.S., dhe P.K. për të regjistruar dhe operuar këto kompani në emrin e tyre. Këto veprime përbëjnë elemente të veprave penale të mashtrimit tatimor, fshehjes së të ardhurave dhe moskallëzimit të krimit.
Prokuroria gjithashtu ka zbuluar se në këtë skemë mashtrimi mund të jenë të përfshirë edhe persona të tjerë, studio kontabiliteti dhe zyrtarë shtetërorë. Hetimet dhe procedurat ligjore janë ende në vazhdim për të dokumentuar plotësisht të gjithë aktivitetin kriminal.
