Një zjarr ka përfshirë një sipërfaqe rreth 5 hektarë me shkurre, ferra e të mbjella në Uznovë të Beratit ditën e sotme.
Sipërfaqja e djegur është e konsiderueshme, ndërsa flakët janë favorizuar nga era dhe janë përhapur me shpejtësi në drejtim të banesave të lagjes, ku ka më së shumti banorë të komunitetit Rom.
Dyshohet se zjarri ka qenë i qëllimshëm dhe fillimisht është vënë në përroin e Zagores, ku aktualisht nuk ka ujë dhe është i mbuluar nga shkurret. Era ka favorizuar flakët, të cilat më pas janë afruar drejt tokave me të mbjella dhe banesave që ndodhen aty pranë. Banorët e lagjes kanë lajmëruar zjarrfikësen e cila mbërriti në vendin e ngjarjes me shpejtësi.
Flakët janë lokalizuar në një kohë të shkurtër dhe është bërë e mundur fikja e vatrave të zjarrit që po u afroheshin banesave, ndërsa banorët të frikësuar kishin dalë jashtë.
Bëhet me dije se policia është duke punuar për identifikimin dhe kapjen e autorëve të zjarrvënies. Paraprakisht është raportuar se janë djegur thuajse pesë ha me shkurrë, ferra e të mbjella.
Gjatë muajve të fundit janë raportuar shumë zjarre të qëllimshme, sidomos në qarkun e Beratit. Megjithatë vetëm disa prej autorëve kanë rënë në pranga.
